Lancôme – Teint Idole gleði

Vörur sem fjallað er um eru gjafir

Teint Idole línan frá Lancôme er klassík fyrir þær konur sem vilja vörur sem endast vel á húðinni, haldast mattar og eru olíulausar. Upprunalegi farðinn fékk smá yfirhalningu og svo eru snillingarnir hjá Lancôme á Íslandi að gera frábæra hluti með því að bjóða okkur upp á að gera umbúðirnar af cushion-farðanum aðeins persónulegri. Fyrir frekari útskýringar þá lesið þið bara áfram!

Teint Idole farðinn frá Lancôme er löngu orðinn klassískur enda hefur hann verið í framleiðslu hjá Lancôme í rúm 20 ár. Hann fékk nýlega nýtt nafn og nýja flösku – en ekki nýja formúlu og kallast hann nú Teint Idole Ultra Wear sem lýsir eiginleikum hans frekar vel. Hann á að hafa 24 klukkustunda endingu án lagfæringar og hann á ekki að smitast.
Farðinn á sér marga aðdáendur um allan heim og má ætla að þeim fjölgi þessa dagana þar sem að litaúrvalið hefur verið bætt og nú eiga allir að geta fundið sér tón við hæfi.

Formúlan er þekjandi en á sama tíma létt og minnir mig svolítið á “second-skin” farða þar sem farðinn bráðnar einhvernvegin inn í húðina en samt myndi ég ekki setja hann í þann flokk. Áferðin á húðinni er frekar mött en samt með ljóma svo útlitið er náttúrulegt en það eru efni í farðanum sem sjúga í sig olíu til að minnka gljáa. Ég hafði aldrei prófað þennan farða fyrr en ég fékk þetta glas hér að ofan og ég sé svolítið eftir því að hafa ekki prófað fyrr því ég er mjög hrifin. Mér finnst svolítið sterk lykt af farðanum fyrst eftir að maður setur hann á en mér finnst hún hverfa eða venjast hratt samt. Mér finnst farðinn endast vel á mér, hann gefur fallega áferð og það er auðvelt að stýra þekjunni með mismunandi áhöldum og t.d. ef maður vill blanda í rakakrem. Formúlan er með SPF 15 sólarvörn.
Ég nota lit 010 í Teint Idole Ultra Wear og í Teint Miracle og myndi segja að litirnir væru frekar svipaðir og ég varð ekki vör við að þessi farði oxaðist á húðinni eins og “long-wear” farðar gera venjulega.


Teint Idole Ultra Cushion er svo önnur útgáfa af Teint Idole farða en sú er fljótandi farði í “svamp”-formi en hann er aðeins léttari og með náttúrulegri áferð (minni þekju) en fljótandi farðinn hér að ofan. Ég myndi lýsa áferðinni á þessum sem demi-mattri og endingin er mjög góð þó hún nái hinum ekki alveg. Formúlan gefur meiri raka og kælir húðina við ásetningu svo þetta er fullkomið til að laga förðun yfir daginn/kvöldið. Allure verðlaunaði cushion-farðann árið 2016 og ég verð að vera sammála þeirri úthlutun því þetta er svo þægilegt fyrir okkur sem eigum það til að mála okkur í bílnum. Formúlan er með SPF 50 sólarvörn svo farðinn er fullkominn fyrir sumarið.

Þessa dagana stendur yfir spennandi kynning í Lyfjum og Heilsu í Kringlunni og Glerártorgi (frá fimmtudeginum 30. mars til sunnudagsins 2. apríl) þar sem allar vörur frá merkinu eru á 20% afslætti og þar eru kaupaukar í boði. Það sem gerir þessa kynningu þó extra spennandi er það að þið getið fengið áletrun á Teint Idole Ultra Cushion boxin sem þið kaupið eða ef þið eigið box fyrir þá getið þið keypt fyllingu og látið merkja boxið. Það er fátt eins skemmtilegt og persónulegt eins og merktar snyrtivörur. Áletrunin verður í boði milli 14 og 18 á bæði fimmtu- og föstudag en á laugardaginn frá 13 til 17. Ég mæli með að þið kíkið við og skoðið þær nýjungar sem eru í boði og nýtið afsláttinn á kynningunni.

NÝLEGT Í MAC: Colour Rocker og varaskrúbbar

Nýlega komu tvær nýjar línur í MAC á Íslandi, Colour Rocker og varaskrúbbarnir sem ég hef setið á mér með að skrifa um síðan í janúar. Ég var búin að kaupa mér úr báðum línum í New York fyrr á þessu ári og þegar að vörurnar komu hingað var ég svo lánssöm að fá einn varalit í viðbót að gjöf út Colour Rocker línunni.

Fyrst vil ég segja ykkur frá Colour Rocker línunni sem samanstendur af 28 möttum varalitum í mismunandi litum. Ég keypti mér Mud Wrestler sem er að mínu mati fallegasti nude-litur sem ég hef prófað. Hann er silkimjúkur og fullkominn litur fyrir mig, hlutlaus beige sem er ekki of “peachy” og ekki of brúnn. Liturinn sem ég fékk frá MAC á Íslandi var svo Evening Buzz sem er gráleitur-lavender litur, litur sem ég hefði ekki valið mér sjálf en þegar að ég prófaði hann var ég mjög hrifin. Hann er enn mýkri en Mud Wrestler og áferðin á báðum er mjög “smooth”. Línan er í klassískum MAC umbúðum og henni fylgir ekki nein skreyting. Mig minnir að varalitir í MAC kosti 3490 krónur (ég keypti varalit um daginn en finn ekki kvittunina til að kíkja á verðið).

Næsta vara er Lip Scrubtious varaskrúbbur og ég keypti mér Summer Berry sem er dökkur berjalitur sem ilmar dásamlega. Skrúbburinn er sykurskrúbbur og olían í honum gefur vörunum næringu og gerir þær mjúkar. Mér finnst hann mjög þægilegur og ég er mjög sátt með hvað hann undirbýr varirnar vel fyrir varaliti, sérstaklega þegar að maður ætlar að nota matta varaliti sem vilja ýkja allar misfellur. Mig langar í vanilluskrúbbinn og hef hann á óska-innkaupalistanum mínum svo ég get sagt að ég mæli með Lip Scrubtious skrúbbunum.

Endilega kíkið á þessar nýju og vönduðu varavörur í MAC en þið fáið faglega aðstoð í verslununum við val á vörum frá snillingunum sem vinna þar.

NÝTT: MAC – WORK IT OUT

Vörur sem fjallað er um eru bæði keyptar af greinarhöfundi og sendar sem gjöf

Nýlega kíkti ég á kynningu í MAC í Smáralind þar sem margar af samfélags- og fjölmiðlakonum landsins komu saman til að sjá nýjustu línu MAC sem kallast Work It Out. Línan er innblásin af litasprengju áttunda áratugarins og litapallettan endurspeglar það fullkomlega, vörurnar koma í áberandi sterkum og fallegum litum og heildarmynd línunnar er ótrúlega vel heppnuð. Ég fékk eina vöru úr þessari línu með mér heim í poka og fór svo daginn eftir og bætti við annari.

Hér er varan sem ég keypti mér en þetta er glossið Crystal Glaze Gloss og ég keypti litinn Sixxx Pack sem er barbíbleikur. Glossið er silkimjúkt og gefur vörunum mikla næringu en það minnir mest á lituðu varasalvana sem MAC seldi fyrir mörgum árum og voru í miklu uppáhaldi hjá mér því formúlan er laus við klístur og er “instant” rakabomba. Liturinn er passlega sterkur og er frekar kaldbleikur á vörunum og glossið helst frekar vel á. Ég tók það með til London yfir helgina og er alveg heilluð og er alvarlega að íhuga að kaupa mér Nice Cheeks litinn.

Hér er svo varan sem ég fékk í pokanum heim en það er In Extreme Dimension maskari í litnum Warm Up. Formúlan er mjög sérstök en hún minnir mig meira á “mousse” heldur en venjulegan maskara. Formúlan á að vera nærandi og á ekki að flagna af/molna niður yfir daginn. Þessi maskari kom í 16 litum í þessari línu og ég var spenntust fyrir bláum lit sem ég prófaði á kynningunni en þessi kom mér ótrúlega á óvart. Burstinn er sérstaklega stór og tekur í sig mikla formúlu og dreifir henni jafnt yfir hvert einasta augnhár. Endinn á burstanum er með hárum og hann nær vel í bæði innri og ytri augnkrók og líka góður í að setja maskara á neðri augnhárin. Mér finnst formúlan klessast svolítið en það er í góðu lagi því “klessurnar” gera litinn meira áberandi. Liturinn sést ekki vel í fjarlægð en “up close” er hann frábær, sérstaklega við bláa/fjólubláa augnförðun eins og þið sjáið hér að neðan.

Jújú, mikið rétt, ég get enn málað mig þó þið sjáið það sjaldan. Ég er þó að taka mig á í því og reyna að vera aðeins duglegri að nota snyrtivörurnar mínar en ég hef verið í rosalegri lægð, andlega og líkamlega, en vonandi fer að birta til. Litagleðin í þessari línu hressti mig allavega svolítið við (og að skreppa til London síðustu helgi) svo þið gætuð farið að sjá aðeins meira af mér á næstunni þó það séu alveg að koma próf og ég alveg núll undirbúin.

Nóg um mig í bili! Þið finnið þessa gullfallegu línu einungis í MAC í Smáralind og það er gaman að segja frá því að verðin í MAC lækkuðu hressilega fyrir ekkert svo löngu síðan og því enn skemmtilegra að versla en áður, ég er búin að tapa kvittuninni minni fyrir því sem ég keypti en mig rámar í að ég hafi séð augnhár á 2490 krónur sem voru áður mun dýrari. Ég hvet ykkur til að kíkja!

YSL – The Shock!

Sælt veri fólkið! Hér er löngu “overdue” færsla um nýjar vörur frá YSL sem komu í búðir fyrir þónokkru síðan en hafa verið mér efst í huga undanfarið. Ég hef verið frekar andlaus, þreytt og buguð undanfarið og er að skríða útúr skelinni og koma mér aftur í gír þessa dagana eftir að hafa sett öll plön í klessu (ég plana allt sem ég get planað, ég segi ykkur kannski frá því seinna).

En ef við snúum okkur að þesssum nýju og stórglæsilegu vörum þá er komin ný förðunarvörulína frá YSL í verslanir á Íslandi. Vörulínan kallast The Shock og fylgdi komu nýjasta Black Opium ilmvatnsins en það kallast Black Opium Floral Shock. Ég held mikið upp á Black Opium ilmina og þessi var enginn undantekning en mig grunaði samt aldrei að honum fylgdu þessar nýju og fínu vörur. Ég fékk að prófa nokkrar þeirra og ætla að segja ykkur frá þeim.

Stjörnuvaran fyrir utan ilminn sjálfan er nýr maskari sem kallast Mascara Volume Effet Faux Cils The Shock og honum verður eiginlega best lýst með einu orði – VÁ! Útkoman var strax fullkomin þegar að ég prófaði í fyrsta skipti, formúlan er þétt, þykk og alveg mött þegar að hún þornar og hún nær einhvernvegin að festast á hverju einasta hári án þess að maður þurfi að vanda sig um of. Burstinn er passlega stór og lagið á honum hjálpar manni að setja maskarann fullkomlega á svo útkoman er dramatísk og ekki of fínleg og hann nær að halda sveigjunni á augnhárunum allan daginn án þess að molna. Hann kemur í 3 litum en minn er svartur.

Næsta vara sem ég ætla að segja ykkur frá er Eye Duo Smoker sem er kremaugnskuggatvenna sem er fullkomin fyrir nútímakonur sem farða sig á ferðinni. Ég prófaði litinn Smoky Burgundy sem er fjólublár en það eru 3 aðrir í boði. Hver penni inniheldur 2 kremskugga, annar er dökkur og mattur en hinn er ljós og með sanseringu. Formúlan er algjör snilld, hún blandast auðveldlega, helst vel á (ég er með olíukennd augnlok) og er frábær grunnur undir aðra liti. Ég hef mest prófað endinguna í rúma 12 tíma og á þeim tíma runnu litirnir ekkert til og því verð ég að setja þessa formúlu í top5 yfir alla kremskugga sem ég hef prófað.

Þriðja varan er augnglossið sem má auðvitað nota sem glært gloss yfir hvað sem er. Glossuð augnlok er tíska sem ég hef verið frekar spennt fyrir og er loksins farin að geta verið með í. Að nota klassískt varagloss á augun hefur ekki gert sig fyrir mig þar sem augnskuggarnir hafa venjulega verið farnir í klessu eftir minna en mínútu en þetta augngloss gerir þetta frekar þægilegt. Það sem ég mæli með er að nota lítið í einu og prófa sig áfram, ef maður fer varlega þá getur augnförðunin vel verið falleg út kvöldið. Augnglossformúlan er frekar létt og lítið klístruð og hana má auðvitað nota yfir varaliti, í highlight (þetta er fáránlega fallegt á kinnbein fyrir fallega og frísklega áferð) og svo framvegis.

 

Síðasta varan er svo Couture Variation augnskuggapalletta í lit 4 og kallast Underground. Hún fær ítarlega færslu á næstunni þar sem ég ber hana saman við fyrri Couture Variation formúluna en í þessari er ný formúla sem er auðveldari í blöndun, litsterkari og endist betur á augnlokunum (ég er búin að sannreyna það). Það eru færri púðuraugnskuggar en í fyrri pallettum en á móti koma ljós augnskuggagrunnur og svartur kremeyeliner sem gera pallettuna enn praktískari.

Þar með er það sem ég prófaði upptalið. Heilt yfir finnst mér The Shock línan vera ein sú heildstæðasta og besta sem ég hef séð koma á markað í langan tíma. Hver einasta vara sem ég prófaði hentaði mér allavega vel og mér fannst þær allar minna mig á Black Opium sem er auðvitað tilgangurinn. Ég hvet ykkur til að skella ykkur á næsta sölustað YSL og kíkja hvort það sé ekki eitthvað fallegt í stöndunum úr þessari línu eða bara til að finna lyktina af nýjasta ilminum.

Þar til næst,

P.S. Viljið þið sjá þessar vörur “in action”? Látið mig vita!

NÝTT: Ultimate Basics – Urban Decay

Varan er gjöf

Hæ! Naked Ultimate Basics pallettan frá Urban Decay er eins og allir vita komin til Íslands og þar sem mér áskotnaðist eintak langar mig að segja ykkur frá henni eftir að hafa prófað hana vel og vandlega, mér finnst mikilvægt að vera búin að prófa hvern einasta skugga vel áður en ég skrifa um pallettuna.

Naked Ultimate Basics er eins og nafnið gefur til kynna, hluti af Naked línunni frá Urban Decay. Naked palletturnar eru orðnar ansi margar og Basics er undirlína sem varð til þegar að notendur fóru að biðja um fleiri hlutlausa, matta augnskugga sem myndu henta öllum. Það eru til tvær litlar Basics pallettur og svo bættist Ultimate Basics í hópinn og er ástæða þess að við erum hér að blaðra í dag. Myndin hér að neðan er svo “grainy” að það er önnur aðeins neðar í færslunni.

Ultimate Basics inniheldur 12 nýja, matta og hlutlausa augnskugga (Ekki sömu litir og í hinum Basics pallettunum). Þar sem litirnir eru hlutlausir henta þeir fyrir alla og litirnir henta vel í hversdagsfarðanir og sem stuðningur við aðrar pallettur (það eru snilldar blöndunarlitir í pallettunni). Skuggarnir eru í samræmi við aðra matta skugga frá merkinu, mjúkir, ekki of púðurkenndir og blandast vel. Ástæðan fyrir að ég segi aðra matta er því sanseruðu skuggarnir frá UD hafa venjulega verið skilgreiningin á “buttery” lýsingunni en mattir eru aðeins erfiðari í framleiðslu og oft verða mattir skuggar bara eins og krít. Endingin er mjög góð, skuggarnir eru enn fallegir í lok dags og virðast ekki dofna.

Mínir uppáhalds litir: Blow, Tempted, Lethal, Blackjack og Lockout.
Samsetningar sem ég mæli með:
Einföld dagförðun: Blow (augnkrókur og undir augabrún) + Tempted (yfir augnlokið og blandað eins hátt og förðunin á að fara) + Lockout (dýpkun á skyggingu og aðeins inn á augnlokið í ytri augnkrók) með Blackjack í augnhárarótina (sem léttur eyeliner).
Kvöldförðun: Blow (augnkrókur og undir augabrún) + Tempted (í “crease” til að stilla af hæðina á skyggingunni) + Lockout (“crease” til að dýpka) + Lethal (augnlok og “crease”) + Blackjack (í “crease” og ytri augnkrók ásamt örlitlu á innri hluta augnloksins fyrir meiri dýpt).

Ég er ekki viss á verðinu á pallettunni en grunar að hún sé á svipuðu verði og Moondust eða rétt rúmlega 8 þúsund, ég ætla samt að gera ráð fyrir 8500 í niðurbrotinu á verðinu fyrir ykkur. Fyrir 8500 krónur fást þá 12 augnskuggar, hver þeirra er 1,2 grömm af augnskugga og heildarþyngd vöru sem þið fáið er 14,4 grömm. Hvert gramm er þá á c.a 590 krónur sem er mjög gott verð. Hver skuggi kostar ykkur þá c.a 708 krónur.

Ég mæli með að þið kíkið á UD skvísurnar í Hagkaup í Smáralind og fáið að kíkja á þessa frábæru pallettu á meðan að hún er enn til.