NÝTT: MAC – WORK IT OUT

Vörur sem fjallað er um eru bæði keyptar af greinarhöfundi og sendar sem gjöf

Nýlega kíkti ég á kynningu í MAC í Smáralind þar sem margar af samfélags- og fjölmiðlakonum landsins komu saman til að sjá nýjustu línu MAC sem kallast Work It Out. Línan er innblásin af litasprengju áttunda áratugarins og litapallettan endurspeglar það fullkomlega, vörurnar koma í áberandi sterkum og fallegum litum og heildarmynd línunnar er ótrúlega vel heppnuð. Ég fékk eina vöru úr þessari línu með mér heim í poka og fór svo daginn eftir og bætti við annari.

Hér er varan sem ég keypti mér en þetta er glossið Crystal Glaze Gloss og ég keypti litinn Sixxx Pack sem er barbíbleikur. Glossið er silkimjúkt og gefur vörunum mikla næringu en það minnir mest á lituðu varasalvana sem MAC seldi fyrir mörgum árum og voru í miklu uppáhaldi hjá mér því formúlan er laus við klístur og er “instant” rakabomba. Liturinn er passlega sterkur og er frekar kaldbleikur á vörunum og glossið helst frekar vel á. Ég tók það með til London yfir helgina og er alveg heilluð og er alvarlega að íhuga að kaupa mér Nice Cheeks litinn.

Hér er svo varan sem ég fékk í pokanum heim en það er In Extreme Dimension maskari í litnum Warm Up. Formúlan er mjög sérstök en hún minnir mig meira á “mousse” heldur en venjulegan maskara. Formúlan á að vera nærandi og á ekki að flagna af/molna niður yfir daginn. Þessi maskari kom í 16 litum í þessari línu og ég var spenntust fyrir bláum lit sem ég prófaði á kynningunni en þessi kom mér ótrúlega á óvart. Burstinn er sérstaklega stór og tekur í sig mikla formúlu og dreifir henni jafnt yfir hvert einasta augnhár. Endinn á burstanum er með hárum og hann nær vel í bæði innri og ytri augnkrók og líka góður í að setja maskara á neðri augnhárin. Mér finnst formúlan klessast svolítið en það er í góðu lagi því “klessurnar” gera litinn meira áberandi. Liturinn sést ekki vel í fjarlægð en “up close” er hann frábær, sérstaklega við bláa/fjólubláa augnförðun eins og þið sjáið hér að neðan.

Jújú, mikið rétt, ég get enn málað mig þó þið sjáið það sjaldan. Ég er þó að taka mig á í því og reyna að vera aðeins duglegri að nota snyrtivörurnar mínar en ég hef verið í rosalegri lægð, andlega og líkamlega, en vonandi fer að birta til. Litagleðin í þessari línu hressti mig allavega svolítið við (og að skreppa til London síðustu helgi) svo þið gætuð farið að sjá aðeins meira af mér á næstunni þó það séu alveg að koma próf og ég alveg núll undirbúin.

Nóg um mig í bili! Þið finnið þessa gullfallegu línu einungis í MAC í Smáralind og það er gaman að segja frá því að verðin í MAC lækkuðu hressilega fyrir ekkert svo löngu síðan og því enn skemmtilegra að versla en áður, ég er búin að tapa kvittuninni minni fyrir því sem ég keypti en mig rámar í að ég hafi séð augnhár á 2490 krónur sem voru áður mun dýrari. Ég hvet ykkur til að kíkja!

NÝTT: Makeup Art Cosmetics frá MAC

Vörurnar eru gjafir

Nýjasta línan frá MAC var að koma í verslanir og ég ætla að segja ykkur svolítið frá henni, undirlínunum 3 og fólkinu á bakvið þær. Þetta gæti orðið löng færsla en ég reyni að halda henni eins stuttri og hægt er svo þið getið haldið áfram með daginn.

MAC Makeup Art Cosmetics er nafn línunnar og að henni standa Kabuki, James Kaliardos og Diane Kendal sem eru öll heimsfrægir listamenn þegar að kemur að förðun. Línan inniheldur rúmlega 50 vörur í heildina og þetta er í fyrsta skipti þar sem MAC fer í samstarf við sjálfstæða förðunarlistamenn til að búa til “limited” línu en þetta er auðvitað frábær tilbreyting því í slíku samstarfi er ætti áherslan að liggja í gæðum og notkunarmöguleikum, að búa til eitthvað sem þeim fannst vanta. Þetta eru allt ólíkir listamenn með mismunandi áherslur og því gaman að sjá hvað útkoman er mismunandi.

James Kaliardos er sá listamaður sem mér þótti mest spennandi að sjá útkomuna hjá því áherslan hjá honum hefur alltaf verið glæsileiki, að þú sért glæsilegasta útgáfan af sjálfum þér og hlutlausir litir hafa svolítið einkennt hans vinnu. Hann hefur áorkað ýmsu í gegnum tíðina og til dæmis þá hefur hann unnið mikið með Hillary Clinton, Julianne Moore, Miley Cyrus og Anne Hathaway.

Diane Kendal hefur einkennst af klæðilegum-glamúr og áherslan hjá henni í gegnum tíðina hefur verið á bronslituð augnlok og kinnar með sterkum litum. Hún hefur verið áberandi í förðunarheiminum í mörg ár og virðist hafa unnið fyrir flest stærstu merki heims í bæði í auglýsingaherferðum og á tískusýningum.

Kabuki er svo umtalsvert dramatískari og línan hans er litríkust. Hann leggur áherslu á að notendur línunnar prófi sig áfram og í viðtali við Bustle bendir hann á að ef þú setur blá-fjólubláa Dazzleshadow skuggann úr línunni hans yfir dekksta Retro Matte litinn úr línunni færðu út burgundy með bjölluáferð (þ.e. minnir á bjöllur). Kabuki segir að MAC hafi tekist að gera óskalistann hans að raunveruleika í þessari línu og ég verð að segja, óskalistinn hans höfðar ansi vel til mín.

Ég fékk 3 vörur úr línunni hans James og ég er bókstaflega og mjög eðlilega ástfangin. Fyrst ber að nefna augnskuggann en ég fékk Pressed Pigment í litnum Black Grape sem við höfum séð áður hjá MAC en James lýsir þessu sem demanta-“accent” fyrir augun því skugginn glitrar svo fallega á augunum. Ég verð að segja að ég er sammála honum og var reyndar mjög spennt fyrir þessu því hún Birna vinkona mín er mikill aðdáandi þessa skugga sem ég hafði aldrei komist í fyrr en nú. Hann er bara alltaf fallegur, sem augnskuggi, sem smáatriði í förðun, yfir varalit og svo framvegis. Ég elska fjólubláa skugga svo þetta var eiginlega “meant to be”.

Næsta vara sem ég vil sýna ykkur er Into the well augnskuggi í litnum Matte Galena sem er eyeliner í púðurformi sem má nota bæði blautan og þurran en það er dæld í miðjunni á skugganum sem hentar vel ef maður ákveður að bleyta skuggann. Það má auðvitað líka nota vöruna sem augnskugga og liturinn minn er svona grákaldblár. Hann blandast vel og er silkimjúkur en alveg mattur.

Síðasta varan er sú vara sem mér þótti mest spes en það er Strataglass glossið sem kallast Pyrite og er þriggja lita gloss. Glossið er semsagt í þremur lögum í glasinu, neðst er dökkbleikt gloss með satínáferð, miðjan er ljósbleik með gylltu glimmeri og efsta lagið er glært með gylltu glimmeri. Þetta blandast samt allt saman í fallegan lit á vörunum sem fer vel með flestum varalitum/blýöntum ef maður vill bæta við smá glimmeri/ljóma í förðunina. Mér finnst glossið mjög fallegt og þægilegt á vörunum því það gefur svolítinn raka (mér finnst það meira rakagefandi en t.d. Lipglass formúlan).

Þið getið kíkt í MAC verslanir og skoðað línuna og séð hvað gæti hentað ykkur!

Bestu andlitsförðunarvörur 2016

ÚFF! Ég skil ekki hvað tíminn líður hratt og því mikilvægt að drífa þessa árslista af svo við getum farið að byrja á einhverjum nýjum og ferskum umfjöllunum um nýjar, nýlegar og eldri vörur (því við erum auðvitað alltaf að kynna okkur eitthvað nýtt). Hér eru að mínu mati bestu andlitsförðunarvörur ársins 2016.

Við byrjum auðvitað á “all-time” uppáhalds farðanum mínum, Teint Miracle frá Lancôme sem ég var einmitt að kaupa nýtt eintak af. Hann er alltaf fullkominn, áferðin, þykktin, þekjan og bara allt. Það verður erfitt fyrir aðra farða að reyna að velta þessum úr sessi.
Shimmering Skin Perfector í vökvaformi frá Becca hefur ekki verið að fá næga ást hjá mér hérna á blogginu en ég elska að blanda þessum fljótandi highlighter við farða, nota hann undir farða sem og yfir hann fyrir smá auka, náttúrulegan ljóma. 
Touche Éclat penninn frá Yves Saint Laurent, gull-ljóma-penninn víðfrægi verður að sjálfsögðu að fá að vera með á listanum. Ég nota 2 liti af pennanum og eeeelska hvað þetta er góð formúla og gefur ljóma sem er svo fullkomlega eðilegur og maður virðist hafa sofið í 16 klst.
Le Cushion Encre De Peau farðinn frá Yves Saint Laurent er nýjung sem fór strax á listann um leið og ég prófaði hana í fyrsta skipti. Þetta er handhægasti “on-the-go” farði sem ég hef nokkurntíman prófað, þekjan er góð og hann helst vel á. Umbúðirnar eru líka gullfallegar (bókstaflega).
Les Sahariennes Bronzing Stones frá YSL er uppáhalds sólarpúðrið mitt. Það er í nokkrum litum, ég á þann ljósasta og get gluðað því framan í mig alveg að vild. Púðrið er eitt það fínmalaðasta sem ég hef prófað og það er örfín sansering í mínum lit. Það er bara ekki hægt að klúðra förðuninni með þessu sólarpúðri.
RCMA No-Color Powder er alveg litlaust, hræódýrt púður sem allir geta notað (ég borgaði 9 dollara í USA). Það er einn ókostur og það er að umbúðirnar henta manni ekkert sérstaklega vel dagsdaglega svo mér finnst alltaf eitthvað fara til spillis, ekki það að ég kvarti þegar að einn dunkur er 3oz. Ég sá að RCMA var að vara við fölsuðum púðrum í umferð svo ég mæli ekki með að rjúka til á Ebay eða Aliexpress að versla púður (ekki versla snyrtivörur á Aliexpress, ever! alveg bannað!)
Lancôme Effacernes hyljarinn, vatnsheldur, táraheldur, hylur allt og maður þarf svo pínulitla bólu af hyljara til að hylja verstu bauga/bólur/allskonar. Mér finnst hann líka mjög þægilegur til að setja í kringum varirnar, bæði til að “eyða” útlínunum og vera smá grunnur undir varablýant/lit og svo til að lagfæra línu sem er ekki alveg nógu skörp.
Urban Decay Naked Skin farði og hyljari, skothelt kombó. Báðar vörur innihalda efni sem hafa jákvæð áhrif á húðina, þekjan er góð, áferðin er frábær og ég bara get ekki mælt nógu mikið með þeim.
theBalm Mary-Lou Manizer er “my girl”. Þessi highlighter er minn uppáhalds, fínmalaður og með hinn fullkomna lit fyrir mína hálfglæru hvítu húð. Það þarf að fara varlega svo maður blindi fólk ekki í réttri lýsingu en þetta er einn af fáum highlighterum sem er bara sanseraður en ekki með neinu glimmeri.
MAC kinnalitir og þá sérstaklega bleiki kinnaliturinn úr samstarfslínu Mariah Carey og MAC sem kom mér ótrúlega á óvart og ég nota hann vandræðalega mikið. Ég mæli líka með kremkinnalitunum eins og t.d. Posey sem ég keypti í vor, mér finnst hann snilld!

Eins og ég hef sagt milljón og þrisvar gleymdi ég örugglega helling svo þið verðið bara að fyrirgefa það. Síðasti hlutinn er tilbúinn en það eru vörur fyrir varir sem stóðu uppúr á árinu 2016. Fylgist með honum og svo getum við farið að spjalla um meira sniðugt því það lítur út fyrir að ég muni að öllum líkindum (nú jinxa ég þetta) hafa tíma til að skrifa meira og sýna ykkur meira. Þið getið fylgst með mér á snapchat undir notandanafninu thorunns þar sem ég segi ykkur stundum frá einhverju sniðugu þegar að ég er í stuði og ef þið viljið sjá eitthvað sérstakt eða mynduð vilja lesa eitthvað sérstakt þá hafið þið bara samband við mig hér, á facebook, snapchat eða í tölvupósti.

Þar til næst,

Uppáhalds augnförðunarvörurnar 2016

Hæ! Nú er það partur tvö af uppáhalds vörunum mínum fyrir 2016. Ég átti eiginlega erfiðast með þennan part, augnförðunarvörurnar voru nefnilega mjög margar og flottar á síðasta ári og ég er örugglega að gleyma milljón og þremur hlutum. Ég tók bæði inn nýjar og eldri vörur því ég vildi segja ykkur frá mínum “ultimate” uppáhalds, óháð því hvenær þeim var skellt á markað. Byrjum á pallettum og vinnum okkur svo í gegnum listann.

Fyrsta sem ég skelli hérna inn er Moondust pallettan frá Urban Decay sem ég keypti mér þegar að Urban Decay opnaði hér á landi. Formúlan á þessum skuggum er svo þægileg að ég nota glimmerin mín alltaf minna og minna því þetta er svo einfalt í einni pallettu. MAC er með svipaða augnskugga sem eru Dazzleshadows fyrir þá sem hafa áhuga, þeir eru bara til stakir.

Couture Palletturnar frá Yves Saint Laurent rata á listann, palletta 13 er hin fullkomna palletta til að eiga í veskinu til að gera sig sætan á núll einni en hún hentar bæði í dag- og kvöldförðun. Palletta númer 7 er einnig í miklu uppáhaldi og ég er óttalega veik fyrir pallettum sem koma í takmörkuðu upplagi reglulega.

Viseart er framleiðandi sem ég eeeeelska en palletturnar frá þeim eru í hæsta gæðaflokki. Bridal Satin pallettan er á topplistanum mínum því hún er ótrúlega fjölhæf, litsterk og falleg.

MAC pigmentin verða örugglega á öllum listum hjá mér til eilífðar, bæði því þau eru svo fjölhæf OG því þau munu örugglega endast mér það lengi. Ég á sérstakt uppáhald í pigmentinu Kitschmas sem er ljósfjólublátt og súperfallegt. Ég mæli með því að skoða pigmentin því það má nota þau í naglalökk, augnskugga, gloss, í farða og svo framvegis og svo framvegis.

Full Metal augnskuggar frá Yves Saint Laurent og þá sérstaklega liturinn 11 Bonnie Copper sem kom í sumarlínu YSL árið 2016 og er hinn fullkomni litur fyrir fyrirhafnarlausa augnförðun í flýti. Skuggarnir eru í einskonar glossumbúðum og eru kremformúla, mæli með!

Moonshadow augnskuggarnir frá Make Up Store fá að rata á listann, extra mjúkir og fjölhæfir. Þeir eru extra stórir svo það má nota þá í nánast hvað sem er, t.d. highlight. 

MAC Paint Pot í litnum Groundwork. Fullkominn “taupe” litur fyrir fljótlega förðun með einum lit, einnig sem grunnur undir aðra skugga. Auðvelt að blanda hann út og vel pigmentaður.

Urban Decay Primer Potion í Original litnum. Besti. Augnskuggaprimer. Í. Heimi! Ókei kannski ekki en allavega sá besti sem ég hef prófað. Ég á heilar 3 túpur af honum því ég vil alls ekki vera án hans. Hann gerir alla augnskugga betri, þeir festast betur og eru mikið litsterkari ásamt því að endast næstum endalaust á augnlokinu. Ég er með oily augnlok og kann viiiirkilega með meta þessa aðstoð.

Dipbrow Pomade frá Anastasia Beverly Hills í litnum Ash Brown. Þessi litur er fullkominn í augabrúnirnar mínar og það er svo auðvelt að nota þetta í augabrúnirnar. Ég nota alltaf bursta frá Zoeva sem kallast Brow Line í Dipbrow og þá er auðvelt að nota passlegt magn svo brúnirnar séu náttúrulegar en samt jafnar. Liturinn endist vel og rennur ekki til nema maður nuddi brúnirnar duglega. Það geta allir fundið sinn lit í augabrúnavörunum frá Anastasia Beverly Hills.

Grandiôse eyelinerinn frá Lancôme er byltingarkennd nýjung því það er hægt að beygja hann til að auðvelda ásetningu fyrir alla. Formúlan er góð, liturinn er þéttur og hún endist vel og burstinn er frábær í að gera fullkomna línu. Lisa Eldridge hefur gert frábæra hluti fyrir Lancôme árið 2016 og ætlar að halda því áfram á þessu ári.

Liquid Eye Liner frá MAC úr samstarfslínu þeirra með söngkonunni Mariah Carey verður að fá að vera með en þetta er einn best heppnaði brúni blauti eyelinerinn sem ég hef prófað. Liturinn er passlega dökkur og passlega kaldur brúnn litur svo öll förðun er mikið mildari en annars. Það er auðvelt að nota eyelinerinn og hann endist vel á og það er auðvelt að þrífa hann af.

Augabrúna”maskarinn” Sourcils Styler frá Lancôme stóð virkilega uppúr því burstinn er frábrugðinn öðrum augabrúnagelburstum, ég hef sagt ykkur frá honum áður. Formúlan heldur augabrúnunum vel í skefjum og gefur mikið náttúrulega útlit heldur en að nota bara blýant eða lit, það er meiri dýpt.

Maskarar ársins voru tveir en það eru Hypnôse Volume-a-porter frá Lancôme og Telescopic Carbon Black frá L’Oréal. Ég ætla ekki að segja neitt meira um það en vildi hafa bæði “drugstore” og “high-end” maskara á listanum.

Síðasta varan er síðasta snyrtivaran sem ég fékk í hendurnar á árinu 2016, rétt fyrir áramótin en það er Lash Story frá House of Lashes. Ég keypti reyndar Pro týpuna sem rúmar fleiri augnhár en þetta er ss bók til að geyma gerviaugnhár svo maður sé ekki með fullar skúffur af augnhárabökkum. Pro útgáfan rúmar 22 pör ásamt lími og venjulega útgáfan rúmar 10 pör. Ég set inn sér umfjöllun um þessa vöru á næstunni.

Þá er það upptalið sem ég ætlaði að segja ykkur frá í augnförðunarvörum. Eins og ég sagði áðan þá gleymdi ég örugglega einhverju og biðst strax afsökunar á því. Ég hlakka til að sýna ykkur næsta hluta.

NÝTT: MAC X MARIAH CAREY

Færslan er ekki kostuð

Í DAG kom nýjasta lína MAC í verslanir á Íslandi en það er samstarf söngkonunnar/dívunnar Mariah Carey og MAC. Eftirvæntingin hefur verið gríðarleg og línan selst upp mjög hratt allsstaðar þar sem hún fer í sölu og ég held sjálf að Ísland verði engin undantekning. Það var þó eitthvað til í Kringlunni áðan þegar að ég kom við á leiðinni úr vinnunni. Umbúðirnar eru einar mestu glam-umbúðir sem ég hef séð frá MAC og einkennast af silfurglimmeri og gulllit. Ég er búin að prófa þrjár vörur úr línunni; fljótandi eyelinerinn (This Is My Night), bleika kinnalitinn (You’ve Got Me Feeling) og gloss (Dreamlover). Ég ætla að sýna ykkur nokkrar vörur úr línunni og setja með komment við þær sem ég prófaði. Ég fékk myndirnar af netinu samt.

This Is My Night er brúnsvartur fljótandi eyeliner, frábær formúla sem er auðvelt að setja á og hreinsa af. Var búin að gleyma hvað þessi formúla er góð – ég átti einu sinni alltaf nokkur eintök í einu.

Glossarnir eru gullfallegir, ég fékk Dreamlover að gjöf og elska hvað það er áberandi en á sama tíma passlega “muted” (já ég veit að ég tala í þversögn þarna). Mig langar að bæta við Rainbow Interlude glossinu sem er þetta ljósasta.

Varalitirnir eru svo fallegir, ég átti erfitt með að hemja mig í búðinni áðan því mér þykja umbúðirnar svo fullkomnar.

 

Kinnalitirnir eru súper fallegir og ég á þennan efri sem kallast You’ve got me feeling.

 

 

Ég hvet ykkur til að kíkja í næstu MAC verslun og skoða línuna, ég er allavega að íhuga að koma við aftur og kannski mögulega bæta smá við.

Þar til næst,
Þórunn

1 2 3