Lancôme – Teint Idole gleði

Vörur sem fjallað er um eru gjafir

Teint Idole línan frá Lancôme er klassík fyrir þær konur sem vilja vörur sem endast vel á húðinni, haldast mattar og eru olíulausar. Upprunalegi farðinn fékk smá yfirhalningu og svo eru snillingarnir hjá Lancôme á Íslandi að gera frábæra hluti með því að bjóða okkur upp á að gera umbúðirnar af cushion-farðanum aðeins persónulegri. Fyrir frekari útskýringar þá lesið þið bara áfram!

Teint Idole farðinn frá Lancôme er löngu orðinn klassískur enda hefur hann verið í framleiðslu hjá Lancôme í rúm 20 ár. Hann fékk nýlega nýtt nafn og nýja flösku – en ekki nýja formúlu og kallast hann nú Teint Idole Ultra Wear sem lýsir eiginleikum hans frekar vel. Hann á að hafa 24 klukkustunda endingu án lagfæringar og hann á ekki að smitast.
Farðinn á sér marga aðdáendur um allan heim og má ætla að þeim fjölgi þessa dagana þar sem að litaúrvalið hefur verið bætt og nú eiga allir að geta fundið sér tón við hæfi.

Formúlan er þekjandi en á sama tíma létt og minnir mig svolítið á “second-skin” farða þar sem farðinn bráðnar einhvernvegin inn í húðina en samt myndi ég ekki setja hann í þann flokk. Áferðin á húðinni er frekar mött en samt með ljóma svo útlitið er náttúrulegt en það eru efni í farðanum sem sjúga í sig olíu til að minnka gljáa. Ég hafði aldrei prófað þennan farða fyrr en ég fékk þetta glas hér að ofan og ég sé svolítið eftir því að hafa ekki prófað fyrr því ég er mjög hrifin. Mér finnst svolítið sterk lykt af farðanum fyrst eftir að maður setur hann á en mér finnst hún hverfa eða venjast hratt samt. Mér finnst farðinn endast vel á mér, hann gefur fallega áferð og það er auðvelt að stýra þekjunni með mismunandi áhöldum og t.d. ef maður vill blanda í rakakrem. Formúlan er með SPF 15 sólarvörn.
Ég nota lit 010 í Teint Idole Ultra Wear og í Teint Miracle og myndi segja að litirnir væru frekar svipaðir og ég varð ekki vör við að þessi farði oxaðist á húðinni eins og “long-wear” farðar gera venjulega.


Teint Idole Ultra Cushion er svo önnur útgáfa af Teint Idole farða en sú er fljótandi farði í “svamp”-formi en hann er aðeins léttari og með náttúrulegri áferð (minni þekju) en fljótandi farðinn hér að ofan. Ég myndi lýsa áferðinni á þessum sem demi-mattri og endingin er mjög góð þó hún nái hinum ekki alveg. Formúlan gefur meiri raka og kælir húðina við ásetningu svo þetta er fullkomið til að laga förðun yfir daginn/kvöldið. Allure verðlaunaði cushion-farðann árið 2016 og ég verð að vera sammála þeirri úthlutun því þetta er svo þægilegt fyrir okkur sem eigum það til að mála okkur í bílnum. Formúlan er með SPF 50 sólarvörn svo farðinn er fullkominn fyrir sumarið.

Þessa dagana stendur yfir spennandi kynning í Lyfjum og Heilsu í Kringlunni og Glerártorgi (frá fimmtudeginum 30. mars til sunnudagsins 2. apríl) þar sem allar vörur frá merkinu eru á 20% afslætti og þar eru kaupaukar í boði. Það sem gerir þessa kynningu þó extra spennandi er það að þið getið fengið áletrun á Teint Idole Ultra Cushion boxin sem þið kaupið eða ef þið eigið box fyrir þá getið þið keypt fyllingu og látið merkja boxið. Það er fátt eins skemmtilegt og persónulegt eins og merktar snyrtivörur. Áletrunin verður í boði milli 14 og 18 á bæði fimmtu- og föstudag en á laugardaginn frá 13 til 17. Ég mæli með að þið kíkið við og skoðið þær nýjungar sem eru í boði og nýtið afsláttinn á kynningunni.

Cushion kinnalitur frá Lancôme

Varan er gjöf

Það er komið svolítið síðan þessi nýjung frá Lancôme kom á markað en hér er hún loksins mætt. Hér höfum við nýjustu kinnalitaformúluna frá merkinu sem er í Cushion-formi eins og farðarnir sem Lancôme hefur sett á markað síðustu misseri.

Formúlan er mjög litsterk og það þarf mjög lítið fyrir náttúrulega útkomu en það er einhverskonar ljómi í kinnalitnum svo áferðin er extra frískleg. Það er auðvelt að byggja formúluna upp ef manni finnst liturinn ekki nægjanlegur en formúlan er ofur-létt og fljótandi í svampinum og blandast fullkomlega á húðinni, alveg sama hvað maður setur mikið. Það þarf að dúmpa henni á húðina og mér finnst best að nota bara fingurna eða bursta en svampurinn er samt þægilegur valmöguleiki þegar að maður er að hafa sig til á ferðinni. Liturinn dofnar aðeins fyrr heldur en ef ég væri að nota púðurkinnaliti en þó ekki þannig að maður taki sérstaklega eftir því, ég myndi kannski segja að hann væri farin að dofna örlítið eftir heilan 8 tíma vinnudag en ég er ánægð með endinguna.

Formúlan inniheldur rakagefandi efni og hefur kælandi áhrif sem er stundum mjög vel þegið, mér er alltaf heitt í framan svo ég elska allt svona kælandi og finnst það svo frískandi. Rakagefandi efnin eru mjög praktísk sérstaklega núna yfir vetrarmánuðina þar sem húðin vill verða þurr og leiðinleg (það snjóaði í gær, það kemur ekki vor alveg strax) og þá er gott að geta lagt púðrinu sem vill stundum hafa þurrkandi eiginleika. Einnig er kinnaliturinn mjög sniðugt lausn fyrir þá sem elska ljómandi og “dewy” áferð á húðinni ásamt því að halda lúkkinu sem allra náttúrulegustu sem ég er að vona að við förum að sjá meira af á næstu mánuðum, ég er alveg búin með þessa möttu tísku og er alveg til í að leggja henni í nokkur ár.

Umbúðirnar eru eins og áður segir Cushion umbúðir þar sem svampur sem er fullmettaður af fljótandi formúlu er settur í box og á slíkum umbúðum er nauðsynlegt að hafa tvöfalda lokun, þétta lokun til að svampurinn þorni ekki upp og svo lokun á boxinu sjálfu. Í lokinu er spegill og það fylgir lítill og sætur svampur með. Kinnaliturinn er minni en farðarnir, mér finnst hann þó hafa heilmikið value því mér finnst ég rétt pota í svampinn fyrir passlegt magn.

Ég mæli með því að þið skellið ykkur á næsta sölustað Lancôme og kíkið á kinnalitina, það eru 3 yfirtónar og hver tónn hefur 2 liti. Tónarnir eru ljósbleikir litir, berjalitir og kórallitir. Minn kinnalitur er litur 024 Sparkling Framboise og ég hef augastað á 02 Rose Lemonade og 032 Splash Corail.

YSL Fusion Ink farðinn – nú bæði í cushion og fljótandi!

dsc_0005vörurnar eru gjafir

Ég hef setið á mér frekar lengi með að segja ykkur frá Le Teint Encre De Peu farðann frá YSL eða Fusion Ink eins og þeir kjósa að kalla hann á ensku. Ég er búin að eiga fljótandi útgáfuna í nokkra mánuði en vissi að það væri cushion útgáfa á leiðinni svo ég ákvað að bíða og geta sagt ykkur frá báðum í einu. Nú er þetta ágæta cushion (svampfarði, púðafarði, hvað eigum við að kalla þetta?) komið til Íslands og því kominn tími á orðaflaum.

Fusion Ink eru ofurléttir “long-wear” farðar sem eiga að endast allan daginn. Þeir innihalda rokgjarnar olíur (eru þunnfljótandi, sambærilegt við Air De Teint frá Lancôme) og “bráðna” við húðina og gefa að mínu mati miðlungsþekju. Það hafa allir og amma þeirra heyrt um fljótandi farðann (ég var mjög sein að taka við mér) en hann gefur semi-matta áferð og ljóma á sama tíma og hann er svo léttur að maður finnur ekki fyrir honum á húðinni. Hann hefur hentað best fyrir þær sem hafa smá olíu í húðinni (blönduð húð út í feita húð) og ég gat byrjað að nota hann í sumar þegar að húðin mín tók stakkaskiptum og fór að fá bólur á fullu (þið sjáið hvað húðliturinn er ójafn á fyrir-myndinni hér að neðan). Ég hef verið mjög ánægð með fljótandi farðann og hef aðallega notað hann með bursta 187 frá MAC sem er duo fiber bursti. Þið sjáið fljótandi farðann á hægri hlið andlitsins á eftir-myndinni hér að neðan.

dsc_0025

Nú að þessum nýja. Ég get sagt strax að mér finnst þessi farði mjög góður og hann hentar mér eiginlega betur en fljótandi útgáfan. Litirnir eru aðeins ljósari (ég nota B10 í fljótandi, er með B20 í þessum) og eru passlega hlutlausir, ekki of bleikir og ekki of gulir. Formúlan er rakagefandi og með meiri ljóma en sú fyrri en mörgum þótti fljótandi útgáfan festast svolítið í þurrkablettum en þessi gerir það ekki. Áferðin er þar af leiðandi ekki eins mött  en ég myndi segja að þekjan í þessum sé meiri en í hinum svo hann er mjög drjúgur því maður notar ekki mikið í einu. Formúlan oxast ekki mikið (oxun er mikið vandamál hjá sumum) svo það er hægt að treysta á litinn þegar að formúlan hefur þornað (það gerist hratt, ekki setja klessu á kinnina og ætla að blanda hana út á eftir).

Ég er týpan sem málar sig oftast á ferðinni (sit venjulega í bílnum og mála mig áður en ég fer inn einhversstaðar) svona dagsdaglega og finnst snilld að fá farða sem ég þarf ekki að hafa miklar áhyggjur af í töskunni og að ég þurfi ekki að taka burstana mína með mér. Mér finnst gott að geta lagfært förðunina yfir daginn (ég er dugleg að nudda allt af mér yfir daginn, sérstaklega ef ég er mjög þreytt) og þá er gott að vera með farðann í litlu boxi með spegli.

combine_imagesFyrir: einungis rakakrem – Eftir: <– Cushion | Fljótandi –>

Í lokin er hér samsett mynd. Ég er alveg ómáluð með rakakrem á fyrir-myndinni en á eftir-myndinni er ég með cushion farðann vinstra megin og þann fljótandi hægra megin. Ég er ekki með neina aðra förðunarvöru framan í mér og engan primer. Ég er bæði með bólur og sár sem eru áberandi dökkrauð og leiðinleg svo ég vildi sýna ykkur hvernig farðarnir hylja það.

Ég er gríðarlega ánægð með farðann og hvet alla til að skoða hvort cushion-farði sé eitthvað sem henti þeim. Það hófst YSL kynning í Lyfjum og heilsu í Kringlu í morgun (fimmtudag) sem stendur út sunnudag þar sem þið getið leitað til sérfræðinga sem geta ráðlagt ykkur við val á vörum. Samkvæmt facebook er 20% afsláttur af öllum YSL vörum og kaupaukar ef keyptar eru tvær vörur eða fleiri.

Þar til næst,
Þórunn